Jag van bedreigde spesies finansier bewaring

NELSPRUIT – Die onlangse veiling van ‘n jaggeleentheid om ‘n swart renoster in Namibië te jag, is wyd deur diereregtegroepe gekritiseer. Dié jaggeleentheid is tydens die afgelope naweek op ‘n veiling in Dallas, Texas vir $350,000 (R3,75 milljoen) verkoop. Diereregtegroepe sê dit mag aanvaarbaar wees om oortollige dierebevolkings uit te dun, maar hou vol dat alle swart renosters weens hulle bedreigde status beskerm moet word.

Lizanne Nel, bestuur van bewaringsaangeleenthede by die SA Jagters en Wildbewaringsvereniging (SAJWV) sê die kommer wat onder oningeligte dieregtegroepe heers, bewys dat baie mense nie die beginsels van verantwoordelike en volhoubare benuting verstaan nie. “Deursigtigheid en goeie kommunikasie vanuit jagtersgeledere is nou uiters belangrik om vrese te besweer dat verantwoordelike jag die oorlewing van spesies en selfs bedreigde spesies benadeel,’ het sy gesê.

SAJWV steun die verantwoordelike jag van wild, insluitende bedreigde spesies, mits dit in pas is met ekonomiese, sosiaal-maatskaplike en omgewingsfaktore. Nel beklemtoon dat jag inkomste genereer, bewaring aanmoedig en bydrae tot die sosio-ekonomiese welstand van mense.

Sy verduidelik dat volhoubare jag ‘n geïntegreerde benadering verg om die impak op die ekonomie, die gemeenskap en die omgewing te evalueer. In ontwikkelende lande soos Suid-Afrika en Namibië staan bewaring in dieselfde tou as sosio-ekonomiese ontwikkeling om geld uit staatskoffers te ontvang. Die feit dat alle provinsies ‘n tekort aan geld het om aan bewaring te bestee, dui daarop dat begrotings vir bewaring onvoldoende is om vir prioriteite aan te wend. Die wildbedryf – en veral die jagbedryf – bied alternatiewe inkomste wat bewaring kan finansier.

Nel het verwys na ‘n onlangse studie deur die Noordwes Universiteit dat die wildbedryf in Suid-Afrika in 2012 sowat R7.7 miljard gegenereer het, waarvan 70% uit jag afkomstig is. Plaaslike jagaktiwiteite het die meeste bygedra met R5.5 miljard, terwyl trofeejag R556 miljoen ingebring het.

Hierdie geld lewer ‘n aansienlike bydrae tot bewaring, waaronder die bekamping van renosterstropery. “Verantwoordelike jag en ekotoerisme stimuleer bewaring en dra by tot die welstand van arm landelike gemeenskappe op marginale grond wat baie min landboupotensiaal het. Hierdie inkomste verminder die las op die Staat, het Nel beklemtoon.

By die CITES-vergadering in Bangkok Thailand in 2013, het die internasionale gemeenskap erken dat jag tot bewaring bydra. Beide Suid-Afrika en Namibië het elkeen ‘n kwota van vyf swart renoster gekry om mee handel te dryf. Die kriteria vir die toekenning van handelskwotas van bedreigde spesies, waaronder die swart renoster, verseker dat dit nie ‘n negatiewe uitwerking op die oorlewing van die spesies mag hê nie.

Hierdie handelskwota, wat die onlangse veiling van die renosterjag in Namibië insluit, bevestig dat regerings en wetenskaplike owerhede van 178 lande die impak van benutting deeglik ondersoek het. Verder pas beide Suid-Afrika en Namibië streng maatreëls toe om te verseker dat die jag van ‘n spesifieke dier nie daardie spesies se oorlewing benadeel nie.

Die Biodiversiteitsbestuursplan vir renosters wat onlangs ingevolge die Wet op Biodiversiteit (NEMBA) gepubliseer is, sluit kriteria in waaraan voldoen moet word voordat die Nasionale Departement van Omgewingsake, die provinsiale bewaringsowerhede en die Renostersbestuursgroep die jag van ‘n individuele dier goedkeur.

“Die evaluasiekriteria maak voorsiening vir die bestuur van renosters volgens die goedgekeurde plan wat slegs die jag van bulle wat nie meer voortplant nie, toelaat. Indien hierdie diere nie verwyder word, vrek hulle van ouderdom of beseer hulle ander teeldiere en kalfies – iets wat dikwels gebeur. Laasgenoemde het beslis ‘n beduidende impak op spesifieke populasies,” sê Nel.

COMMENTS

International News

hazyview_smallmpumalanganews_sallnelspruitpost_smallsteelburger_publication_newwhiteriver_smallbarbertonTimes_smallcorridor_smallgetitagriecoRD_smalllooklocal.co.zaDealfinderAutodealer.co.za
Top